「左麟右李」再合體　望打造飲食王國

樂壇校長譚詠麟與歌手李克勤開設的餐廳「左麟右李」於銅鑼灣舉行喬遷之喜典禮，校長推着譚媽媽現身，之後與克勤即場切燒豬及為金獅點晴！

新鋪成食堂

自克勤過檔英皇後，兩人難得於公開活動上合體，校長說：「生意Keep住有嘅，雖然佢去海外進修，但學成會番嚟。」克勤亦說：「呢個同唱片公司冇關嘅，佢唔會抽我佣㗎。」問到可會再開分店？克勤指應該不止一間，他們已準備好幾卷剪綵金帶。而校長坦言開分店想選擇在人流多的地方，但比較難搵。提到他應有很多舖在手，他笑說：「要啱先得，寫字樓嗰啲冇用。（好多棟寫字樓？）我唔敢答你。」至於這裡是否他們的新飯堂？校長坦言經常會來：「唔使講，呢度方便，近停車場，啱晒。」克勤亦謂因為住得近，家人差不多每個星期都會來吃飯。而餐廳中有以兩人命名的菜式，如「校長炒飯」、「克勤叉燒」，他們亦表示會為菜式給予意見：「有時去到唔同地方睇到啲古靈精怪嘅美食，番嚟就會諗可唔可以放落去。」

譚曉風多女追？

問到可會想打造「左麟右李」的飲食王國？校長說：「有呢一日最好，但唔容易嘅。」克勤亦謂開店容易，但要維持水準很困難：「依家香港3間，澳門、上海、馬來西亞都有，有十間左右。（可以上市？）鞏固多啲先啦，同埋中國都仲有好多省份，咁大嘅版圖，好多嘅進步空間。」問到可想衝出亞洲？克勤說：「New York？都可以嘅，但一遠呢，請人好煩，唔容易。」校長亦指要派人去監管水準亦需要時間和成本。提到兩人的下一代都未學成歸來，未能幫手打理生意，兩個兒子仍小的克勤說：「我仲遠啦，有排。」校長就問克勤是否讓兒子到英國讀書：「咁細個就去英國？唔捨得㗎。」克勤說：「未，邊有咁快呀。」講到校長身在外地讀書的兒子譚曉風，問到兒子是否多女仔追，他很快做老爺？校長即說：「大吉利是！一講我眼鏡又濛。唔使咁早，見識多啲先啦，成個森林都係。」克勤則說：「溝吓冇乜嘢嘅，後生仔。」