【做足八年幾】可宜今日喺有線Last Day

20161009
東網電視
更多新聞短片
有線又有主播走,今次係可宜。

有線娛樂新聞主播可宜,唔經唔覺已經喺有線八年幾,原來可宜較早前已經辭咗職,今日仲係佢Last Day!人緣唔錯嘅佢,最後一日開工獲唔少公司同事同佢Farewell,仲紛紛送上蛋糕同鮮花,望可宜前程錦繡咁話!

問到可宜做咗成八年幾,為何會捨得唔做時,佢就話想試多啲新嘢:「喺有線都已經八年幾,其實咩都試過晒,好似去影展、做主持同埋主持節目等等,都覺得係時候要嘗試新嘢。(唔捨得?)都會呀,話晒都做咗咁耐。」

可宜亦話喺有線咁耐,當中有唔少難忘事,佢話:「記得有年去影展,嗰日得0度,大家見到啲女明星着得好少布咁行紅地氈,但其實佢哋只係行幾分鐘,但我哋就等足成日,諗番起真係好凍。」佢又話曾經有次拍節目,拍成十幾粒鐘先放飯,結果竟然...可宜話:「碟飯上面竟然有隻曱甴,當我望住嘅時候真係喊咗出嚟,心諗辛苦咗成十幾個鐘,點解個天要咁對我?!點知個攝影師話早知咁拎部機出嚟影低佢,依家諗番起都真係幾搞笑。」

可宜透露離開有線後會先去美國旅行,問到會否過檔無綫?佢話:「暫時未諗呀,有機會都想試吓唔同嘅嘢!」