錢小豪戥錢嘉樂輸賽車唔抵：以為贏硬

藝人錢小豪出席廚房電器店Fisher & Paykel開幕禮，他表示今日來支持朋友。他透露個多月來都很忙碌，之前忙搞拳賽，日前又與細仔支持弟弟錢嘉樂的賽車比賽，期間他表示戥弟弟輸得不值：「佢排到頭位，我哋賽車術語叫『揸條孤寒位排頭位就贏梗』，我哋仲講笑佢咁孤寒一定攞硬冠軍，點知輸咗畀舊電！我叫佢下次帶定個尿袋，唔夠電就叉，唔會畀人爬頭。（但佢依家喺明星組都拎冠軍。）如果喺兩個（組別）都贏晒就係雙料冠軍，就係歷史性一刻，或者下年我都一齊比賽，希望可以同場。」

搵大仔演少年版錢小豪

他又透露近日忙拍攝李思捷導演的賀歲片，跟羅家英、元秋、狄龍、林敏驄等人拍攝。首次拍賀歲片的他表示：「淨係見到呢個班底都覺得搞笑。（你會打功夫定負責搞笑？）唔打咁多，年紀大。」問到仔仔可有興趣拍戲？他表示細仔冇興趣拍戲，只喜歡跳舞、賽車，而大仔龐景峰就有意拍戲，故稍後他開拍的殭屍片便會找他來飾演自己少年版。

想買新雪櫃冧太太

另外，講到現場有很多廚房家電，他表示家中已有三個雪櫃：「我好多年前已經有個萬幾二萬蚊港幣嘅製冰雪櫃，依家啲雪櫃愈出愈靚，都心郁郁買返屋企，再裝修搞靚廚房，等太太有好環境煮飯畀我哋食。」