【睇住拍拖到依家】羅蘭神色哀傷抵靈堂

胡楓（修哥）好友羅蘭、薛家燕、梁乃鵬、吳雨、謝賢等於六時許先後抵達靈堂，而白雪仙則與陳寶珠、陳善之陪同到場，向修哥亡妻呂詠荷致別。

身為修哥好拍檔的羅蘭因病未有多作回應，由同行的薛家燕代答，講到修哥剛剛接受訪問時相當難過，薛家燕表示：「諗都諗到，聽羅蘭姐講佢哋係幾十年嘅夫妻，好恩愛，羅蘭姐睇住佢哋拍拖，佢哋係初戀情人到依家，一直互相支持同愛護，又愛錫仔女，知道修哥會好難過傷心，知道阿嫂離開，都有慰問修哥，但唔想騷擾佢，只有傳短訊畀佢，之前同羅蘭都有約一班老友記食飯，但修哥因為要陪太太嚟唔到，當時仲一齊影咗張相畀阿嫂睇。」