《未來戰士2》愛德華費朗走樣反轉衫着

上世紀90年代憑《未來戰士2》（Terminator 2：Judgment Day）未來領袖John Connor一角而走紅的男星愛德華費朗（Edward Furlong）當年紅爆美日，不過後來愛德華因染上毒癮及犯事而令事業跌落谷底。近年冇乜嘢撈的愛德華日前被影到與女性友人在洛杉磯商場「濕平」，好耐冇蒲頭的他殘爆走晒樣，現年39歲的他一頭長髮滿面鬚根身形脹爆，而他更將印上大韓民國的汽水白T恤反轉着配以爛牛仔褲，並拎住個白膠袋，完全零星味！愛德華殘爆重現，與上位作《未》時的他分別甚大！