許瑋甯水底歎咖啡　林心如讚爽！

台灣女星許瑋甯近日趁有空檔去咗外地旅行鬆一鬆，有網友就喺許瑋甯Facebook留言，透露喺台灣機場咁啱撞到準備出發嘅女神感覺好幸運，仲大讚許瑋甯好似仙子下凡一樣靚，認真誇張！

見到粉絲咁識賣口乖，許瑋甯亦相當識do，喺Facebook晒出一張性感嘅比堅尼相益街坊。台灣女神晒比堅尼固然吸引，不過呢張相最特別嘅係，許瑋甯仲向高難度挑戰，喺水底表演飲咖啡！相中見許瑋甯紮住頭髮、着上紅黑比堅尼，盤腿而坐優閒地飲咖啡。有網友見到後都嘖嘖稱奇，仲笑言：「你確定喝的是咖啡嗎」、「可以申請健力氏世界記錄」、「續杯不用錢」，十分搞笑！至於許瑋甯嘅好友林心如亦有趁熱鬧留言，佢表示：「爽爽der（的）」！