缺席細佬簽字結婚　郭可盈爆婚宴唔大搞

名模熊黛林（Lynn）與郭可盈胞弟郭可頌今日簽字結婚。榮升大姑奶的郭可盈，今日並未有見證簽字儀式，她接受電話訪問時表示：「其實今日係簽字，Kim（熊黛林經理人）喺香港等同佢媽媽，所以由Kim做證婚。（點解你冇出席？）林文龍要拍劇，仲未煞科，所以我哋會再揀另一日好日，等埋兩家人食一餐飯，作為兩家人一齊嘅婚宴，唔會大搞。（唔擺酒？）應該唔會大搞，佢哋嘅方向係鍾意簡單，諗住兩家人食餐飯就算，會係簡單而隆重又溫馨咁進行。」

囡囡想要表妹

郭可盈說並不清楚熊黛林會否在家鄉南京擺酒。雖然今日她沒有出席簽字儀式，但已送上禮物給一對新人，是一份有心思的禮物，但因想保留少少秘密感，故不便公開。她說：「依家係一家人，好開心，要恭喜佢哋有情人終成眷屬，佢哋一齊咁夾，又可以到老，組織幸福家庭。Lynn係賢淑嘅女仔，好乖，唔物質主義。（知唔知佢想生BB？）係，知佢好想快啲生。（Lynn同你囡囡相處咁好就知？）係，我問過囡囡，以前佢叫Lynn姐姐，依家要叫舅母，我有問個女想要表弟定表妹？囡囡話想要表妹，因為囡囡想教佢。（你囡囡咁想要伴，你會否再生？）唔會喇，以前囡囡都有提出過，但相隔太耐，呢個責任交畀Lynn。」雖然郭可盈未有現身簽字儀式，但卻帶埋囡囡林天若（津津）與一對新人切蛋糕慶祝，感覺勁溫馨。

另外，曾經與熊黛林合作拍戲的藝人吳千語，透過助手送上祝賀說話，她說：「戥佢好開心，恭喜Lynn搵到幸福，作為朋友當然送上無限祝福，希望佢繼續幸福快樂。」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon