父親成一生遺憾　黃凱芹談絕跡樂壇因由

歌手黃凱芹接受電台錄音訪問，講到他1985年加入電台成為當紅DJ，87年簽約寶麗金走紅兼被喻為「情歌王子」，到92年跳槽到飛圖唱片，直至94年突然移居溫哥華絕跡樂壇，對此他透露當年與經理人因翻唱歌曲起爭拗，故一怒之下移居溫哥華：「其實都係因為轉去飛圖第一首歌《晚秋》紅遍內地而起，當時經理人屬於陳欣健公司，佢覺得翻唱內地歌曲有商機，但我就認為點解要翻唱其他已經唱紅嘅歌？我簽飛圖係想做一個創作歌手，當時同老闆葉志銘講好條件，答應我會有創作空間，但好似事與願違。」最後，經劉美君介紹下，他跟經理人以律師溝通：「我們之間仲有合約，但佢又唔安排工作，又冇出糧，但合約白紙黑字寫咗要同佢哋合作，使咗好多律師費，但最後都告唔成！當時身無分文，頭髮都冇錢剪，所以決定唔做啦，一個人去咗加拿大。」

失去比想像中多

94年黃凱芹隻身移居溫哥華，坦言父親離去令人生留下最大遺憾：「當時一走了之，留低家人，兩年後媽咪同我講爸爸患癌，所以我即刻返香港陪佢，但兩日後他已經去世。呢個可以話係我人生最大遺憾，我失去嘅比大家想像中多，唔係事業，亦唔係錢，遺憾係因為我嘅執着、脾氣，失去咗追都追唔番嘅親情。爸爸好鍾意聽陳百強嘅《一生何求》，所以每次演唱會唱呢首歌，我都有好大感慨。」

至於講到工作，明年就是黃凱芹出道三十周年，他笑言雖然落選紅館演唱會檔期，但仍會推出唱片。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon