添布頓見學生講短期目標:過得一日得一日

20161105
東網電視
更多新聞短片
添布頓今日於香港出席座談會與學生交流!

荷里活名導添布頓(Tim Burton)近日來港不單單宣傳《添布頓異想世界(The World of Tim Burton)》巡迴展覽香港站,今日仲抽空為粉絲簽書以及出席座談會與學生見面兼交流,座談會於下午4時半於香港演藝學院舉行,添布頓一出場即獲全場報以熱烈掌聲及尖叫聲,佢一坐低即多謝大會,而被主持問到來港感受時,佢即放笑彈表示:「就係時差!」

活動一開始,現場學生紛紛提問,有人仲送上畫作俾添布頓,令佢大為驚喜,仲話好中意從心創作,咩形式嘅創作都好中意。添布頓於活動上更大晒幽默一面,被學生問到將來有咩目標時,現年58歲嘅佢就話:「希望過得一日得一日!」講完自己都笑場,不過佢都有解釋,自言唔會諗太遠,只會諗短期嘅事,鼓勵大家都活得有趣味,如果感覺悶就做其他嘢!佢仲自爆自己最怕被「定型」,雖然作品被指黑暗,但自言不覺自己為人「黑暗」,反而唔可以去好認真嘅場面:「愈認真嘅嘢,我覺得愈搞笑。所以唔好帶我去婚禮或者葬禮,因為我會開始笑!」言論即引來全場大笑!

此外,有學生問及添布頓與荷里活影星尊尼特普(Johnny Depp)及前女友海倫娜保咸卡特(Helena Bonham Carter)多次合作的感覺,添布頓明言:「我好中意同佢地合作,見到佢地做唔同嘅嘢感覺好有趣,而同新嘅人工作都好好,好似我最近就同一直好想合作嘅森姆積遜(Samuel L. Jackson)合作。」添布頓仲大讚尊尼特普有對識講嘢嘅眼睛,第一次見佢就睇出對方好有靈魂!而有人問及於曾拍《蝙蝠俠》的添布頓點睇現今超級英雄電影時,佢即笑指:「而家好似一星期就有一部!」仲話於1989年拍超英片時感覺興奮,因為當時未有咁多超英片,唔知而家仲可唔可以拍到。而添布頓完場時更轉身同全場學生影大合照,親民到爆!