創業平台被指賣假貨　陳倩揚即時採取行動

藝人陳倩揚近日與一班媽媽成立了「香港地創業媽」組織，更擔任副主席。不過有指有幹事所賣的貨品是假貨，陳倩揚接受《東網》訪問時，坦言已跟有關人士了解事件，更已終止與相關人士的合作，對方亦不可再以組織名義做任何事，她坦言：「我亦唔希望往後有呢啲事情發生，其實我都想澄清番，我哋同大家都係同步知呢件事，已即時行動，我亦想講呢個創業媽會只係一個組織，並唔係買賣平台，我哋只係搞活動，搞攤位畀一啲有興趣嘅創業媽咪。（咁你從中有冇錢賺？）我係冇錢賺，我要搵錢容乜易，只係我見好多媽媽結咗婚，生咗仔，雖然自己又識做啲手作仔，但都唔敢重拾社會生活，唔想佢哋咁，所以搞咗一個平台。但呢個唔係買賣平台，唔存在任何利益，只係畀佢哋有個可以交流同擴濶圈子嘅地方，我哋每次搞活動，都蝕，講緊五位數字。」問到維持會務是否很困難，倩揚坦言：「係困難㗎！但今次係一個學習，我哋冇權去監管佢哋，大家都係靠信任同精神。」

陳倩揚於晚上透過律師發出澄清及聲明啟示，指「香港地創業媽」純為一個非牟利團體，而被指網上售賣冒牌貨品負責人亦只是「香港地創業媽」之會員，其網絡商店與此會根本沒有任何關係，陳倩揚跟對方的商店亦沒有任何利益甚至非利益關係。