嫌唔夠火花　趙學而唔考慮搵霆鋒做嘉賓

現年44歲的人妻趙學而，今個11月終於一圓所願開行「處女個唱」，首次在Star Hall舉行兩場演唱會，學而表示原先計劃明年才開演唱會，但九展突然有期，學而再三思量下決定「開騷」：「以往幾年一直有人搵我開，但我一路都推，覺得我又冇咩新作品出，貿貿然開演唱會怕畀人誤會我告別呀！直至今年參與劇集演出及唱主題曲，適逢九展有檔期，感覺好似比較「啱數」啲。」

對於首個演唱會，學而覺得歌手用心去唱比起一個天花龍鳳的製作更重要：「市場好多不同需求，有啲好少女、有啲好奔放、有啲跳晒舞，各類形式都需要有，唔可能用一個模式放落每個歌手到。」

講到嘉賓安排，學而稱仍心大心細，原來「天后」是她夢想人選：「有啲歌又好想有嘉賓，又啲歌又覺得不如自己唱，請嘉賓又難開口，我最怕碌人情咭。（最想邊個嚟？）我最想請緊係王菲啦，王菲嘅演唱會係有錢都睇唔到嘛，佢可以嚟做你話幾正。」當年霆鋒曾是學而的緋聞舊愛，大可以直接搵霆鋒請王菲？學而笑言：「咁又唔駛一定咁嘅，仲有好多途徑嘅。」若請不到王菲不如請霆鋒來當嘉賓呢？學而即笑言與霆鋒「欠火花」：「唔...我覺得呢個配搭好似冇乜火花囉，分分鐘我老公爭住上台同我唱。」

老公對她開演唱會會否很緊張？學而承認老公最擔心是她體力和飛債：「我始終一把年紀嘛，做一個演唱會體力負荷係好犀利，老公有時間都會陪我踩單車去練氣。而飛嘅嘢，佢都話好煩問我啲人打嚟點算？我咪話你答佢唔搞咪得囉，唔駛煩嘅。」下一站進軍紅館？學而卻另一個睇法：「我嘅歌唔係好Party feel，唔係載歌載舞果種，形式同紅館一般睇騷唔同，所以先喺九展做，攞咗個感覺先，然後有機會先去大啲場館做啦。」門票反應熱烈已由一場變兩場，學而強調不會讓自己感到壓力：「如果畀壓力自己一定有落差，既然係做自己鍾意嘅事，不如放輕鬆心態去唱。」

服裝：Matt Hui

場地提供：PARC 古道具公園