自稱係「腳人」　陳奕迅鍾意睇韓國女團

歌神陳奕迅（Eason）出席香港大學的「大學問」講座，不少學生專程來捧場，爭取「與神對話」的機會。講到廣東歌不復當年？Eason竟謂：「我覺得天堂鳥值得支持，點解你哋會笑呢，真心覺得佢哋有努力喎。」Eason又謂Taste（品味）方面，普遍覺得這一代是係差咗！但Quality（品質）都好緊要，要懂得選擇好和靚的東西。

隨後有男生指Eason歌的歌詞有Taste，反觀韓國女團的歌欠內涵，Eason即分享他日前逛商場，眼前的80吋高清電視正播着一班韓國女團的影片，他說：「我係『腳人』，即係欣賞腳，當有八對腳係我面前扭，係一定會睇，好多女仔話男仔鍾意大胸，我想講唔係架，唔一定架，男仔只係好奇，正如男仔褲浪有大嚿嘢，你會唔會好奇望？如果大笨象得咁細（示意得手掌咁大），你都好奇望啦，但唔代表係鍾意！」Eason續說：「公道話講句，佢哋啲腳係悅目嘅，咁又點會Care啲歌詞寫乜，要聽歌詞咪聽我嘅歌囉，睇腳咪睇佢哋，唔好混淆嚟講。」

另外，問到Eason若「陳奕迅」這三個字是一個形容詞，會是形容甚麼？Eason笑說：「應該同瘋癲有關係，或者係short short地意思。（如果形容性格呢？）咁會係一個唔跟邏輯嘅人，亦可以係種可圈可點嘅人，因為我通常認真啲人就以為我講笑，我講笑時，啲人又以為我認真，仲唔係可圈可點。」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon