搶杜如風客？項明生自認講旅遊較有深度

旅遊達人兼節目主持人項明生（James）在紅磡出席「星夢郵輪雲頂夢號首航《日耳曼的天空》派對」，見證百億打造的「雲頂夢號」首航及他主持的無綫旅遊節目《日耳曼的天空》首播。訪問中，他表示有過百人出席盛會：「希望節目高收！杜如風都話會睇，因為個節目導演都係佢割愛畀我，佢都去咗歐洲拍咗成個星期！」他更指第一集裏面就已經在德國走進全球最大船廠，見證「雲頂夢號」誕生：「我好似變咗細路仔咁，嗰度啲嘢好大、好誇張！我哋都係第一支攝製隊入去拍攝！」又指上月到船廠參觀時三千個工人仍為該郵輪趕工，今日郵輪已經駛進香港：「好Amazing！」

稱郵輪比較舒服

問旅遊時是否傾向郵輪假期，James即笑謂：「坐過郵輪之後真係中晒毒，細個試過Backpack坐巴士同火車，但係坐郵輪真係好舒服，服務又好，又安排晒嘢食，一瞓醒就已經喺新地方、新港口，好難再返轉頭！」James又透露節目除了在德國拍攝外，亦到了保加利亞、匈牙利和斯洛伐克等取景，其中他便在多瑙河上遊船河：「隻河船就細啲，載百幾人，同海船有個比較。」

晒型爆玩鷹片

談到James在社交網上上載型爆玩鷹片段，他就指當時是對住法國巴黎鐵塔和羅浮宮放鷹：「我第一時間係唔敢望佢，好驚佢會啄我隻眼！但其實佢哋好乖，叼完我手上舊『小鮮肉』就飛走咗！」談到未來工作計劃，他說：「我同杜如風講，我搶唔到佢啲客，佢又搶唔到我啲客，佢講飲講食啲，癲癲喪喪啲，我就有深度啲！」