唔知吳若希有咗？許廷鏗：我哋好耐冇見

歌手許廷鏗（Alfred）及鄭俊弘（Fred）出席電台十大中文金曲記者會，對於同公司的吳若希（Jinny）因待產關係要停工，今年兩人代表公司爭獎責任重大？Fred說：「正常營業！」Alfred則言：「盡力而為，只不過覺得今天過得特別快，不經不覺就到年底頒獎禮，老實講自己今年都好努力去做歌，希望可以攞到一啲甜頭（獎項）。」

同欣宜互相推動

講到Alfred的《我的志願》同《女神》都是獎項大熱？Alfred表示都是因為欣宜首歌爆紅，反而特別令自己想再做好些，他指今次MV都碌盡人情牌，搵好多藝人出鏡，所以他和欣宜是互相有推動作用，Alfred謂：「記得當年我哋係同一屆新人，當時喺頒獎禮後台就講過，希望將來可以台上一齊攞獎。（後台宣言？）咁唔係得我哋兩個，阿Mag（林欣彤）都有份，上年阿Mag喺台度攞獎，我都爆喊，滴眼淚仲流咗落個鼻下面，影出嚟似流鼻涕，非常樣衰。（今年係咪會忍住唔喊？）又唔會，今年盡量放鬆去參與，但又唔會特別Hold住個情緒，成年我都係等呢一個時刻爆出嚟。」

「同大家一樣時間知」

另外，問到Alfred和Fred知否吳若希有三個多月身孕？Alfred謂：「未搵佢，我同大家一樣時間知。」問會否好驚訝？鄭俊弘說：「啱啱知道Jinny有三個幾月嘅BB女，咁就非常之開心，喺度祝Jinny同BB女身體健康、最緊要開開心心，恭喜晒，同埋要佢請食飯。」而Alfred稱已有一排未見過吳若希。

有牙齒問題搵許廷鏗

問是否覺得吳若希有異性沒人性？Alfred即搞笑地低頭望一望自己個肚說：「有！」問會否煲湯給吳若希安胎？Alfred亂說：「龜板？中藥嘅嘢我唔識喎！」Alfred又變得正經謂：「作為朋友知道Jinny正式公布呢個消息係非常之開心嘅，有啲嘢中國人嘅傳統係要遵守番，即係三個月呀，同埋由當事人講番係最恰當嘅，咁今日收到呢個消息我都覺得要送上一啲祝福，呢個係開心事嚟，無論佢係咩角色，媽媽又好、係朋友又好，我哋都一定撐佢，同埋好好哋佗住個BB，有乜牙齒嘅問題都可以咨詢吓我嘅，開心事，咁恭喜佢，送上祝福，希望保持身心健康，我哋點都會撐佢嘅。」講到兩位大男人可會以此為鑑，以免「搞出人命」？兩人笑謂：「大家都小心啲啦！」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon