CK@SM 12月娶圈外女友做財政大神

樂隊Supper Moment結他手CK（張祖光）與女友陳元榆拍拖12年，將於12月17日註冊結婚，CK與女友今個月初就入紙婚姻登記處申請，CK接受《東網》訪問說：「12月17日係攞個吉日，嗰日會有個小型雞尾酒形式婚禮，由律師幫我哋主持簽紙儀式，預計會請100個親友，因為今年好多突如其來嘅事發生，所以未影得切婚紗相，連擺酒都要喺出年9月先補擺。」

兌現承諾　女友30歲前結婚

今年31歲的CK認識女友時，女友還在讀大專，他說：「當年我曾經講過要喺女友30歲前娶佢，佢出年頭就30歲，我嘅承諾要兌現。」CK表示早在兩年前他已向女友求婚成功，他笑說：「我喺一間我哋成日去嘅餐廳，事前同餐廳嘅人單聲，我哋食完飯，我就拎戒指跪低向佢求婚，因為女友講過唔鍾意花，所以冇花，但有cake。」

為tour演唱擱置生B計劃

CK表示樂隊Supper Moment明年應該會有tour演唱，所以生BB計劃最快要等兩至三年，他說：「將來佢有咗BB，我都想照顧到佢，所以生B唔係呢兩年嘅事。」CK大讚女友理財了得，他笑說：「我自己好大頭蝦，唔係好識理財，但有咗佢幫手，生活上穩定啲，佢控制到支出平衡，佢讀會計，好勝任財政打理，所以我交晒畀佢，你知我哋玩band，啲器材已經好重皮，如果再加其他使費，好難維持收入，所以我要早啲娶佢，唔係驚佢走咗。」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon