同翠如鴛鴦浴勁火辣 蕭正楠咀到要扶牆

20161202
東網電視
更多新聞短片
呢場情「浴」戲,真係睇到眼都凸呀!

無綫劇《幕後玩家》高潮位一幕接一幕,尋晩一集就輪到蕭正楠同黃翠如接力掀起話題,佢哋仲公然喺700萬觀眾面前玩鴛鴦戲水,蕭正楠仲赤裸上身,喺鏡中反映出嚟嘅翠如BB亦「赤條條」,真係睇到眼都凸呀!

兩人飾演之角色顧成雙(黃翠如飾)同埋馮汐然(蕭正楠飾)婚姻破裂,成雙為咗令雙方留下美好回憶,臨別秋「波」,甜甜蜜蜜同馮汐然玩足一日,臨尾仲整個「甜品」,大玩火辣鴛鴦花灑浴𠻹!

嘩!嘩!嘩!事關兩人係真情侶兼拍得相當火辣香艷,播畢即成網民熱話,有眼利嘅網友仲話兩人拍嘅時候,蕭正楠有啲失重心企唔穩要扶牆𠻹,唔通翠如太索搞到腳仔軟?!搞笑到呢,真係帶畀大家無限歡欣同幻想!

兩位當事人今日就接受東網訪問,蕭正楠話扶牆原來係「戲」嚟㗎,特登做嘅,咁呢個扶牆戲又想帶出啲乜嘢呢?翠如接力解畫:「因為佢要控制角度,令啲打底衫唔穿崩!」哦!明晒!真情侶拍呢啲戲唔多唔少都會有啲尷尬,翠如亦直言:「真係熟仲尷尬,因為現場太多人,不過,當然心情好複雜,因為下一場離婚所以內心好難過。」

喂!喂!大家唔好淨係掛住睇火辣戲喎,之後,兩人嘅感情戲都做得非常好,顧成雙喺的士上爆喊,同馮汐然喺酒店滿以為同老婆和好如初但原來係「最後一夜」嘅痛哭,都睇到觀眾心都實埋,好多人仲戥馮汐然唔抵,蕭正楠就話:「汐然真係好慘,之後仲有好多虐心戲㗎,好開心大家睇得咁投入,亦有好多人見到翠如演技上嘅進步,佢得到大家嘅認同,我都好戥佢開心。」
__________________________

想聽歌?想睇MTV?想了解本地Indie Band資訊
快啲click入「聲大夾樂」專頁: http://on.cc/musicon