搞到一身蟻?Jessica@SG智破電話騙案

20161210
東網電視
更多新聞短片
Jessica(左圖)話佢因為舉報電話騙案,而搞到有警察上門搵佢,令到佢媽咪嚇親。

組合Super Grils(SG)與師妹陳詩欣及許廷鏗等,出席宣揚滅罪禁毒音樂會。SG以五缺二亮相,隊長Aka解釋表示Cheronna病倒了、Heidi就因為有朋友結婚才缺席。問到有否受過毒品引誘?三女表示未遇過,Aka說:「聽朋友講,當年好多人都會將毒品放喺曲奇餅入面,所以叫我千祈唔好食曲奇。」而Jessica承認求學時為「埋堆」吸了一口煙,她說:「吸完第一啖已經覺得好難食,同係咁咳唔舒服,之後冇再同佢哋玩。」Yanny透露父親是煙民,曾試過偷食對方一支煙,她說:「當時好奇食咗一啖,之後知道好唔適合自己。」

惹鄰居誤會

問到有否試過做好市民?Aka說:「曾經有人偷我電話,有個好市民捉住佢叫佢畀返我,真係好想鬧個賊,同埋忘記咗多謝個好市民。」而Jessica透露曾為舉報電話騙徒搞到一身蟻,她說:「之前收到一個大陸號碼來電,心已經知道係騙案,佢問我記唔記得佢,我就扮記得,之後佢話明天落香港約食飯,我就話好。」伸張正義的Jessica(蔡明思)隨即打999報警,三名警員登門了解及帶她往警署錄口供,嚇得不知情的蔡母以為女兒犯罪被拉,Jessica說:「工人姐姐同媽咪講有警察上屋企,媽咪打電話嚟問咩事,係咁鬧同埋叫我唔好搞咁多嘢。」並透露為免被鄰居及保安誤以為她犯罪,主動要求與警員前後腳落樓兼在屋苑外上警車返警署錄口供,Jessica說:「畀人見到好尷尬。」

會小心飲嘢

同場的陳詩欣坦言自細母親管教很嚴,並經常提醒她離開坐位後,不要飲回枱上飲品,她說:「到依家都記住,只要杯飲品離開視線範圍都唔會再飲。(有冇收過騙案電話?)見到不明來歷電話都唔會聽。」


__________________________

想聽歌?想睇MTV?想了解本地Indie Band資訊
快啲click入「聲大夾樂」專頁: http://on.cc/musicon