胡桐語闖日本藝能界　拍真人騷玩到暈

來自馬來西亞的歌手胡桐語（Iris），去年三月Iris於日本正式出道，憑「甜美酒窩」及擁有長腿的「九頭身」煞食身形，「孭飛」拍攝旅遊真人騷節目火速被日本人認識，成功在日本藝能界闖出名堂，並接拍首個日本護膚品牌廣告。

今次Iris來港為第二首日文歌《I love me》宣傳及訪問。講到拍真人騷的日子，Iris承認過程都很艱辛，因一個女仔在「冇錢、冇電話」從日本最北走到最南地方，她謂：「試過企條路要截順風車去下一站，但企足六粒鐘都截唔到車，仲要落雨，病到差啲暈喺街。（咁冇地方住點算？）所以要去做兼職搵錢，隨時冇地方就要瞓K房，但凌晨四點就收，跟住就要去24小時快餐店坐天光。」Iris稱隨行只有一位攝影師跟着，若她搵唔到地方借宿，會連累對方都瞓街，所以都好大壓力。

日本藝能界競爭激烈，Iris表示：「唔單止日本難，其實香港、甚至全世界嘅娛樂圈都係好難，但最緊要做番自己唔好放棄。」問到想和那位日本藝人合作？Iris坦言：「我好鍾意玉置浩二，好想同佢學下音樂嘅嘢，可惜仲未有機會見到佢。（以為你揀日本小鮮肉？）好多人都話估唔到我會鍾意咁耐以前嘅歌手，但我好鍾意佢把聲，好好聽，令人好感動。」

埸地提供：香港九龍貝爾特酒店