深得人心 岑麗香全靠性格真食腦

20161218
東網電視
更多新聞短片
岑麗香真係好深得人心呀~

岑麗香今日正式升呢為人妻,令萬千宅男一地都係......心碎!香香入行六年以來,要性感有性感,要純情有純情,真係唔止宅男,大人細路都鍾意,甚至影帝周潤發都讚珠圓肉潤夠可愛!香香咁得人心,全因為佢傻大姐性格夠真又夠爆,仲要好食腦?!

日使50蚊道具麵醫肚

慳得一蚊得一蚊!雖然香香搵錢搵唔少,但曾自爆日使五十蚊,為新一代慳神!食得唔好嘥,香香曾被發現照食拍戲用、放咗兩粒鐘、幼麵脹到變粗麵的牛腩麵!事後香香仲話明知拍戲時有好嘢食,更加會留定肚之餘,又講過以前去日本做交流生,日日食燒餅醫肚!

同苟姑娘磨豆腐?

自細喺加拿大長大嘅香香,明知廣東話麻麻,都會好努力去學,但總會爆出笑料!話說有年香香同苟芸慧、高海寧成班女神為台慶綵排跳舞,香香突然大大聲話:「我哋依家磨豆腐!」嚇到高海寧即刻掩住香香個口,仲細細聲解釋佢知,個個笑到轆地!原來香香係想話舞姿似磨豆漿,完全唔知「磨豆腐」點解喎!
香香濕晒

2012年香香憑劇集《巴不得媽媽...》一劇爆紅,一幕濕身白TEE令香香正式打入宅男界,加上之後兩場裸背出浴同玩用水淋心口,有邊個男人唔睇到個心肝仔噗噗跳先!好嘢繼續嚟,早前香香同鄭欣宜合演電影《辣警霸王花》,又係白TEE落水乜都濕晒,33C玲瓏浮凸,落完水梗係要洗白白,仲同欣宜一齊出浴?,唔搶眼都唔得啦!

晒阿婆胸圍騷金句

又係《巴不得媽媽...》!香香見錢嘉樂左手甩骹,竟然剝咗暖笠笠嘅肉色阿婆胸圍,非常猴擒咁要幫對方包紮,真係巴不得Bra Bra!香香仲話胸圍係用嚟保護咪咪同脊骨健康,唔係用嚟畀男人除喎!呢句對白咁爆,即刻成為香香金句!

三個學位一TAKE過

一次過滿足晒三個願望!為一圓父母同自己嘅心願,香香以前喺加拿大讀大學時,一次過讀時裝設計、市場管理同人力資源三個學位,仲好謙虛話自己唔係高材生,只係鍾意讀書咋!而香香選美入行前,原來係做OL喺銀行打工,因為想人生有個紀念而走去選美,好彩香香有去選美咋!

婆仔大迷信

唔好以為香香廣東話唔叻就係鬼妹仔,原來佢都好迷信㗎!香香話如果買鞋畀親朋,會問番對方攞兩蚊雞,搞到人哋O晒嘴,香香唔係貪嗰2蚊,而係話「鞋鞋聲」,唔老利喎!

向發哥挑機

去年周潤發喺東網《我愛發哥》讚香香珠圓玉潤,又話香香似台山人之餘,仲話睇過香香主持嘅飲食節目,想香香煮甜品畀佢食!香香即腦筋急轉彎話:「發哥,我唔係台山人,但我來自加拿大,有好多山,可以帶你去行山!我會隨時整甜品畀你同太太食!」又食字又食腦,把口啷過油,叻叻!