身邊多仔圍！劉佩玥唔認伍允龍係男友

藝人劉佩玥（Moon）、樂瞳、王敏奕、阮兒、李君妍、李豪和無綫監製潘嘉德等出席孫慧雪的婚宴。其中Moon雖然晒腿上陣，但件大褸就冚到實一實，問她是否不想搶新娘鏡？她即笑謂：「今日新娘最靚啦，就算大美人李嘉欣嚟到都搶唔到佢鏡！（你唔早啲嚟搶花球？）我有嘢做，唔知佢哋今晚會唔會拋多次？（拋多次會出力搶？）我會參與囉！其實我以前都搶過，但係一次都冇成功過。」

問Moon會否急結婚？她即答謂：「我唔急結婚喎，未有男友點Plan結婚？（伍允龍唔係你男友？）唔係呀。（伍允龍爭啲咩？）唔知，我哋係好朋友，我未遇到未來嘅老公。（有冇人追？）我有好多男仔朋友喺身邊囉，但係就未有計劃變成男朋友。（全部都係觀音兵？）我信耶穌嘅，唔收觀音兵！」至於問到聖誕節有否男士相約過節？她即慘叫道：「冇呀，好慘，過咗幾年Lonely Christmas！其實都開心嘅，因為可以同屋企人一齊過。」