曾翻唱佐治名曲　杜德偉：逢聖誕想起佢

歌手杜德偉以往曾翻唱佐治米高（George Michael）名曲《Last Christmas》，其《只想留下》亦改編自《Where Did Your Heart Go?》一曲，獲悉佐治離世後接受東網訪問，表示感到好愕然及可惜：「聽到佐治米高逝世消息覺得好突然，因為我知道佢仲好後生，喺佢仲係留緊一把長頭髮同埋佢第一張唱片、當時仲係同Andrew Ridgeley於樂隊Wham!，唱片入面第一首主打歌《Young Guns（Go for it!）》時已經開始有聽，一路至佢慢慢離開樂隊，樂隊當時已留低好多好歌，跟住到佢Solo，自己感覺上一路跟着佢成長。」

杜德偉亦講到曾翻唱佐治名曲：「到自己入行、出唱片，有份翻唱佢一首《Last Christmas》，佢嘅音樂係我自己音樂成長裏面佔一個好大嘅影響力，依家聽到佢去世消息，除咗覺得好愕然之外，仲覺得好可惜，覺得佢喺呢個樂壇仍然可以有好多貢獻。不過，佐治留咗好多好音樂畀我哋，每一年聖誕相信大家都會記番起佢，因為佢有一首好好聽嘅歌叫《Last Christmas》，而佢亦係聖誕節嗰一日離開我哋，有時覺得人生在世，時間唔長，但佢留低咗好多好好嘅嘢畀以後嘅人，已經係一個好偉大嘅音樂人。」