名人：梁婉靜女兒省鏡　薛芷倫二仔有型

達官貴人平時對子女非常保護，甚少同佢哋一齊出席活動，不過除夕呢啲大喜日子，好多名人都會破例，與仔女一同現身，當中不乏亮眼嘅富二代。

活躍於90年代，曾參演《壹號皇庭》系列的前無綫藝人梁婉靜，同埋老公李智康及囡囡一同現身中環，囡囡樣貌標致，身穿上身以珠片點綴的白色拖尾長裙，貴氣盡現非常搶眼，同身穿黑色長裙嘅梁婉靜一黑一白，相映成趣。

而另一位非常搶眼嘅，就係薛芷倫二仔，佢之前喺英國讀書比較少返香港，睇番佢嘅社交網站，以前留有一頭長髮好有型，高大得嚟又好有幽默感，曾經扮過耶穌好搞笑。尋晚佢同媽咪薛芷倫一齊喺中環出席倒數活動，少咗一點稚氣增添咗一份成熟，啲男人味慢慢滲出嚟，絕對稱得高富帥嘅代表！