中文金曲:太極激罕八子同台領金針獎

20170104
東網電視
更多新聞短片
太極八子罕有同台領金針獎,實在難得。

香港樂壇殿堂級樂隊太極在《十大中文金曲頒獎禮》上獲頒「金針獎」,太極一口氣獻唱多首經典作品,當中包括《紅色跑車》、《Crystal》,當唱到《迷途》時,另一主音雷有曜才出場,難得七子齊人同台演唱,掀起高潮,台下歌手都企起身拍掌向太極致敬。

演唱後太極暢談得獎感受,結他手鄧建明先介紹他們的經理人鄧祖德(Joe),鄧建明說:「太極本來有八子,但呢個人放棄打Band,改為做太極經理人,佢就係鄧祖德!」雷有輝笑說:「夾Band好難搵食。」當鄧祖德出場時表現激動,他哽咽說:「感謝電台畀機會令太極可以再一次齊齊整整上台,太極攞『金針獎』係實至名歸。」

一生不要說別離

成員唐奕聰(Gary)多謝歌迷陪伴他們逾三十年,盛旦華就話:「太極喺1984年組成,冇諗過鍾意玩音樂,能夠玩咗32年,呢個唔係奇迹,係神迹。」

雷有曜則表示所有榮譽歸於上帝:「電台令我哋有始有終,由新人獎到『金針獎』,我聽日就返加拿大,我仍然會留意佢哋。」雷有輝感謝電台多年來一直支持、推動太極的音樂,令其歌曲深入民心,又勉勵一眾夾Band的同路人:「只要堅持夢想不放棄,嚟緊幾個十年都會有屬於你哋嘅『金針獎』。」

鼓手Ricky坦言最初媽咪反對他打鼓夾Band,但他覺得一生最幸運就是認識這班兄弟,而劉賢德就感謝太太父母子女,這麼多年在樂壇遇到好多伯樂、前輩,他說:「呢三十幾年冇佢哋唔會有今日,冇大家嘅愛、包容、忍讓,唔可以玩咁耐,我嘅願望太極一生不要說別離。」鄧建明即時「嘩」咗一聲!

阿Lam捱眼瞓頒獎

大會更找來曾獲「金針獎」的由林子祥(Lam)頒獎給八子,阿Lam問劉賢德點解要他來頒獎,他說:「因為你睇住我哋大。」阿Lam又搞笑說:「頭先喺後台好多人問我點解仲未瞓,但我好開心今晚可以夜啲瞓,可以頒獎畀呢班真的漢子。」



__________________________

想聽歌?想睇MTV?想了解本地Indie Band資訊
快啲click入「聲大夾樂」專頁: http://on.cc/musicon