遭千字文攻擊！羅伊婷被嘲最醜選美冠軍

出爐選美冠軍羅伊婷（Daisy）與僅以一票之微落敗的余逸思（Yoshi），雖然賽果已經塵埃落定，但Daisy坦言當選後即被女性友人封為「史上最醜選美冠軍」，更每日收到一篇千字文喪鬧自己，Yoshi則慶幸自己落敗，免得被人雞蛋裏挑骨頭，更自爆男友現時「好驚我被人搶走」！

媽咪負責報名

ViuTV選美真人騷《美選D.n.A》選出現年22歲的羅伊婷（Daisy）為冠軍，但Daisy表示當選後才真正感受到壓力，她說：「選完先感受到負評同壓力，有個平時有講有笑嘅女仔朋友喺Facebook度，話我係『史上最醜選美冠軍』，我有啲唔開心！亦有人抨擊我揀絲帶舞嚟比試，都唔係我弱項，但我想講，我從來冇試過喺6米高嘅地方跳舞，為咗練習我仲被絲帶搞到手臂瘀晒，痛到要媽咪幫我洗頭沖涼，雖然我光脫脫咁，但我同媽咪傾多咗偈，呢個係因禍得福！其實同上次選《TVB周刊》Cover Girl一樣，今次都係媽咪幫我報名，佢話：『贏咗有錢，分畀我』，佢好似好想我入行咁，我覺得呢行新鮮刺激，我都想試！（分咗幾多錢畀媽咪？）其實媽咪平時唔捨得使錢喺自己度，但就買好多衫畀我，我都係畀啲錢佢買嘢食啫！」

好勝贏態度

提到當年在狄易達旗下當藝人，Daisy有種一吐烏氣的感覺，她說：「我參加《美選D.n.A》，舊公司都有叫我加油，當年公司想我走小朋友路線唱兒歌，但我認為自己能力唔止咁，所以走出嚟參選，我想做啲嘢證明畀人睇我得！我唔止選美，仲上過動作特技班，因為我細個學芭蕾舞知道爭崩頭嘅苦況，我好勝，要進步，要挑戰自己！正如我喺選美台上講：『我贏態度』，我男友曾經話過我唔識跳舞，我參選都想證明畀佢睇，佢女友唔係咁差！」

下體現形唔係重點

Yoshi以一票之差敗給Daisy，只能當上「Queen of Devil」，她自評自己輸蝕之處：「Daisy嘅親切同招牌笑容，我係比唔上，我嘅才藝亦爭少少，好多嘢都唔識，因為我真係一個好普通嘅女仔，行街、格價、化妝、貪靚、搞笑，冇咩驚人成就，亦唔係傳統選美材料，我冇諗過自己會喺Devil組攞冠軍，其實我根本唔着重冠唔冠軍，做冠軍好大壓力，會被人雞蛋裏挑骨頭，我只想完成所有任務，我跳舞唔叻，但喺鋼管舞度大家會見到我有進步。（有報道指你跳鋼管舞時下體現形？）比堅尼有着過，但要跳住舞就未試過，當時件衫好貼身，但現唔現形唔係重點，呢個係專業表演，唔好focus喺呢度。」

以蝦頭做目標

Yoshi又爆選美當晚男友亦在場，她說：「佢有去，但冇出鏡，男友好鼓勵我，初初參選好多人批評我似男仔，佢叫我唔使理，仲話：『呢行撈唔掂，返嚟我身邊！』男友好錫我！（嫁得過？）佢每日都好似發咗癲咁同我講，話好驚我被人搶走，但呢啲冇得驚，至於結婚，我年紀仲細，遲啲先！（想喺呢行有咩發展？）我想做旅遊節目主持，因為我係反應彈嚟，鍾意畀反應大家，另外我都想做諧星，我鍾意蝦頭（楊詩敏），覺得佢演唔同角色都好叻，我都想學似佢咁，可以帶歡樂畀人！」

場地：香港九龍東皇冠假日酒店

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon