《3日2夜》新咪神！鄺潔楹黃文意冇得輸

近年無綫可以話係「咪神製造機」，成功捧出唔少性感女神，當中旅遊節目《3日2夜》更加係「咪神」盛產地，一班身懷「胸器」嘅女藝人喺節目着泳裝騷Quali，弗爆身材無限任睇，自然輕易「凸」圍而出啦！出演過《3》嘅張秀文、陳婉衡、陳庭欣、朱智賢同歐陽巧瑩都成為新一代「咪神」，估唔到新一集又有潛力「咪神」跑出喇！

玩濕身誘惑

呢位潛力「咪神」咪就係無綫娛樂新聞台主播鄺潔楹（Judy）囉！《3》尋晚播出嘅一集，就由Judy帶觀眾玩轉台中，發掘當地嘅好去處，不過一班男性觀眾將目光放喺佢個靚樣同身材到囉！節目開頭Judy以熱褲上陣，大騷美腿勁養眼，之後佢去夜市嘅奶茶舖打工，仲戴住牛牛頭飾「賣萌」Sell客。點知好戲在後頭，到節目尾聲Judy終於換上火辣比堅尼，喺室內浸溫泉大玩濕身誘惑，深知宅男心嘅鏡頭仲不時Close up佢個Big爆上圍，成個畫面波濤「胸」湧，真係睇到人嘩嘩聲！

平時最多晒腰

Judy呢次騷Quali，唔少網友都話睇到噴鼻血，仲讚佢禾稈冚珍珠，話估唔到佢平日密密實實，原來身材咁有料！有眼利嘅網友仲話目測佢最少有32C添，睇嚟有望做新一代「咪神」！另外，唔少網友都覺得Judy同後生時期嘅李麗珍「撞樣」，兩個都擁有清純面孔，又有魔鬼身材，真係問你點頂！睇番Judy嘅社交網，私底下嘅佢相當清純，偶爾先會上載做GYM相晒纖腰，同埋甫「影後」相派福利，有網友仲搵到佢早前演出過組合Fantaz嘅MV，呻爆咁遲先發現女神。

有學歷有身材　冇得輸！

而《3》預告下一集由無綫娛樂新聞台主播黃文意（Mandy）做主持，估唔到短短30秒嘅片段引來極大迴響，皆因片中預告Mandy着三點式玩水，鏡頭一個近鏡，見到啲水沿住佢嘅S形Body流落去，最後仲流向深溝，令人無限遐想！目測有34F澎湃上圍嘅Mandy，即時被全城網民起底，原來佢演藝資歷唔淺，細細個做童星入行，同藝人吳鎮宇合作過，Mandy仲同方中信、袁詠儀合演過電影《我愛你》，又拍過食品廣告，有網友仲發現Mandy就讀香港中文大學，認真美貌與智慧並重，更話要推佢做童顏巨乳女神添！

網民有話兒：

LinXXXong：鄺潔楹細細粒，估唔到咁有料，目測最少有32C啦！

XXyWoXX：Judy有d（啲）似後生嘅李麗珍，好清純好正。

justinXXX：樣靚又身材正，簡直係無得頂！！！

李X瀚：黃文意睇落上圍好勁，個樣又得意，真係好正！

XXHONKI：黃文意做童星時眼細細，大個靚咗咁多。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon