臨急轉戰挪威　周秀娜帶兩大篋去睇極光

女神周秀娜（Chrissie）早前同朋友一起計劃用十日去兩個國家旅行，由於時間太急，度了三轉才落實旅程。她原定計劃去巴塞隆拿，但發覺冬遊巴塞沒有甚麼節目好玩，即轉plan去芬蘭聖誕老人村住玻璃屋，又因時間太急，玻璃屋full booking，結果轉去挪威特羅姆瑟（Tromso），同閨蜜住靚民宿等睇北極光，之後再去英國倫敦過新年。

包到冚等極光

Chrissie先到挪威，最開心是終於見到北極光，令她覺得好amazing，她謂：「最好彩係我有個朋友話，2016年睇北極光係最佳嘅一年，幸運之神今年應該眷顧住我。」挪威冬天氣溫零度以下，有備而戰的Chrissie帶了兩大篋同行，她笑說：「我真係第一次準備咁多行李，腳架、相機、背囊、保暖壺、手套、暖包，帶咗好多保暖打底衫褲。睇北極光嗰日係夜晚，又唔知幾時睇到，要長期喺出面，嗰晚我着咗三件打底衫，加羊毛冷衫、多件衞衣再加多件防雪防風褸；下身就三條打底褲，出面再着面褲，啲衫都好多層，每日都好論盡，然後每日拎腳架、相機同背囊出去，因為如果去到影唔到會好可惜，同埋做得咁辛苦，要去睇吓個世界。」

Chrissie在過去一年先後拍了三套電影，她說：「今年都幾滿意，三套電影都唔同戲種，所以都畀啲獎勵自己，plan呢個旅行。」