勁瘀！鄭丹瑞爆鄧月平緊張入錯男廁

藝人鄭丹瑞（阿旦）日前與鄧月平接受鄭裕玲（嘟嘟）主持的電台節目訪問，宣傳主演的電影《小男人週記3之吾家有喜》。阿旦與嘟嘟在前作《小男人週記II錯在新宿》中演一對，相隔27年，終於與「囡囡」鄧月平一家三口團圓，阿旦一見嘟嘟即爆鄧月平的瘀事：「頭先呢個女好緊張，喺出面等要見阿媽呀？好急呀突然間，跟住衝咗入男廁。」

辭演真相

阿旦透露曾誠邀嘟嘟再次演出《小男人3》，可惜未能如願。而嘟嘟亦在節目中自揭真相：「阿旦有同我講過，但係佢好明白，我又唔係好想拍戲，我都好老實同佢講。隔咗一段時間後，阿旦話我哋買晒你戲入面（《小男人》系列）嘅鏡頭，呢個戲話阿Ann過咗身，當你係鬼咁出現，咁你配音得唔得呀？我就考慮啦，真係唔好意思，阿旦，我覺得如果我聲音演出都係演出，咁我不如拍套戲，所以就婉拒咗。」講到嘟嘟辭演，阿旦直認失望：「當然失望啦，我本來諗住約鄭裕玲出嚟，度個劇本動之以情，再隊埋我將屋契出嚟，我想約佢，鄭裕玲話唔使出嚟啦，我已經心知不妙，即刻收番張屋契。但我完全同意鄭裕玲，你睇佢電台節目做得幾開心，冇壓力，節目做得好，多人聽；TVB大騷，有陸永C君畀佢折磨，見到佢又好開心。」

講到嘟嘟指拍戲辛苦，阿旦則表示拍戲不算辛苦，劇組又合作愉快，並且他在60歲生日時承諾要送份禮給自己，重出幕前拍攝《小男人》30周年作品，自言今次追夢成功。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon