83歲譚炳文唔太行得　落雨都氣喘

藝人譚炳文到九龍城出席「長者盆菜宴」，被問到健康近況，他說：「我83歲啦，年紀大就麻煩啦，依家落雨都會氣喘，冇法啦，十幾年前做過心臟手術，我家陣都唔係好行得，條腰唔好，搞到冇運動，唔想做運動。（醫生有冇咩健康忠告？）醫生冇嘢講㗎，只係畀藥你食。（會減輕配音工作？）配音方面會搵啲唔咁重戲嘅嚟做，但求畀腦筋郁吓，好過唔做嘢，唔通坐喺屋企對住工人咩？」

冇同李香琴聯絡

問到有否與老拍檔李香琴聯絡，他說：「好耐冇聯絡，唔知佢近況點，佢冇出嚟又冇見面，傾電話都冇，佢『le le lur lur』咁，打去同佢工人講咩？人老咗就冇法，有幾多個似胡楓咁，仲可以跳舞唱歌，佢仲大我兩年添，我病過，佢冇，係差好遠㗎！」