鄭中基話去揸水　薛凱琪聽唔明

歌手鄭中基在紅館舉行一連四場演唱會的頭場演出，台上先播出聲帶話佢當年發生咗啲意外，令佢開始走去拍戲，拍咗唔少戲，角色對佢有唔同意義，之後台上播出不少佢演出嘅電影片段，如《行運超人》、《龍咁威》等。

叫校長做西人

身穿黑衫的鄭中基自彈自唱《猛龍特警隊》，就除咗西裝外套，換上另一件外套，佢話：「早幾年主力去了拍戲，有機會唱到啲電影主題曲，覺得好似企喺紅館一樣咁難得，仲要係農曆新年喎，其實之前都有期，有一年咁啱校長譚詠麟（阿倫）打畀我，叫我讓個期畀佢，咁我就冇托手㬹，諗住第二年開啦，點知再嚟過李克勤，兩把口加埋，咪冇得講，又過一年點知仲勁，係溫拿5個，加埋成200幾歲，咁我於心何忍，點知嚟到今年仲勁，就係溫拿加太極，我真係冇辦法唔出殺手鐧，我Band Leader係太極其中一個成員，我哋同校長講，亞洲博覽會係好嘢嚟，唔好以為好遠，好多外國歌手都喺嗰度開騷，你西人嚟㗎，喺嗰度開就可以衝出國際，校長就二話不說標咗去亞博開騷！」

等到頸都長

之後鄭中基請咗嘉賓薛凱琪（Fiona）出場，佢踢爆Fiona之前曾擔心大家唔熟佢，但佢就安慰話唔會，之後身穿背心的Fiona就上台，兩人合唱《製造浪漫》，仲行勻台邊同大家打招呼。Ronald多謝Fiona嚟做嘉賓：「佢拍戲嗰陣都有問我點解唔唱歌，叫我開紅館。」Fiona謂：「佢真係要多謝我，佢之前咪澳門開騷。」鄭中基即笑言：「佢等到條頸都長埋。」全場大笑，Fiona謂依家此Gag已經唔興，鄭中基即行去另一邊，指另一邊頸謂：「佢等到另一邊頸都咁長。」認真搞笑。之後鄭中基落台，留Fiona唱歌，Fiona問佢去邊，佢話去揸水，Fiona問講咩，鄭中基話佢鬼妹仔聽唔明，全場大笑。

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon