揮春有自己個樣　許廷鏗面紅：好似好自戀

歌手許廷鏗（Alfred）到觀塘apm商場出席「金雞報喜藝術園年三十倒數夜」活動，與粉絲玩遊戲，並獻唱《我的志願》及《你在我在》，吸引數百粉絲及途人欣賞，連二、三樓也站滿人。他在台上指過年一定會穿西裝，又不會拆利是，因為覺得是幸運，笑言儲滿了幾個櫃桶。到11時59分，他與現場觀眾倒數踏入雞年，又派發揮春，令粉絲high爆！

度團年飯頭痛

受訪時，他自爆剛與鄭欣宜（Joyce）及十多位圈外朋友吃團年飯：「好飽，頂住咗，本身我唔想透露團年飯唔係同屋企人食，不過之前同屋企人已經食咗。點解唔想透露但又透露咗？因為Joyce同我po咗同枱食飯嘅相，呢樣嘢有啲傻，不過都開心嘅。」他認為團年飯需要拍照，因為象徵新一年有好的開始，有送舊迎新和團圓的感覺，他謂：「有鮑魚同盤菜，好滿足，希望新一年豐衣足食。（有冇份煮？）有份去買、度吓個menu，睇吓有咩啱大家食，要度餐單啱咁多人口味係有啲難度，希望大家食得開心。」

打牌賀新年

至於有何特別活動，他坦言只要有Joyce在場，就算沒有活動也會很好笑。他笑言：「我特登荼毒佢，帶咗張麻雀枱上去，佢幾surprise。佢屋企冇麻雀枱，可能以前媽媽打太多，佢依家就好少打。」Alfred自言不太懂打麻雀，不過朋友很喜歡，工作後或會與朋友繼續玩：「呢啲係新年要做吓嘅，唔係賺新年財，打衛生麻雀係農曆新年會做。（有冇贏過？）都有，唔多囉，百零二百。輸就唔記得，唔開心嘢唔好記，不過唔係好到肉，打好細。」

揮春有樣好自戀？

提到現場很多粉絲，Alfred指他們為自己準備了很多揮春，他笑說：「我有啲尷尬，因為揮春面有我隻歌名《你在我在》，好似好sell歌，後面有我個樣，好似好自戀，希望呢個商場嘅朋友可以接受我少少好意。」他表示粉絲們已為他準備了五、六年，年年的款式都不同，覺得很窩心，只是自己派發時會有點尷尬。問到會否叫粉絲改製作其他？他說：「佢哋唔會，應該都會整我個樣，冇理由加吳業坤落去。（可以試吓？）哈哈，咁可能要叫佢嘅歌迷幫我整。」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon