《鐵達尼號》導演第N次解畫：積克必死

《鐵達尼號》（Titanic）今年上映20周年，20年都到，但唔少人仲係戥男主角「里奧仔」里奧勒度狄卡比奧（Leonardo DiCaprio）飾演的「積克」（Jack）死得唔抵，唔少網民成日提出千百個「救Jack方法」，最多人就係叫佢爬埋上度門板，同琦溫絲莉（Kate Winslet)飾演的「露絲」（Rose）一齊等人救，仲有人畫圖列明門板根本仲有好多空間！

《鐵達尼號》名導占士金馬倫（James Cameron）多年來已經N度回應話「積克」死硬，2012年仲講明「積克」爬上門板就會沉，所以有空間都冇用，諗住End咗大家話題？Sorry，大家仲好關心「積克」！

占士近日又再開腔講「積克」之死，講到冇氣嘅佢話其實根本好簡單，劇本就係寫「積克」讓咗個位畀「露絲」令佢可以生存。占士仲話之前曾參與一個節目《MythBusters》，同班科學家及主持討論「救Jack方法」，雖然好有趣，但仍然唔同意科學家叫「積克」同「露絲」除救生衣再綁落門板，佢話：「好啦，當係真喇，你係Jack，你身處負28度嘅海水，個腦開始受低溫症影響，《MythBusters》叫你依家除咗件救生衣，除埋佢（Rose）嗰件，游落呢塊嘢下面，將救生衣綁實等佢唔容易甩出嚟－即係話係要於負28度嘅水中綁嘢，用你5至10分鐘，到你游返上嚟時你已經死咗！所以個方法根本唔可行，佢（Jack）最好嘅選擇就係保持上半身露出水面，希望有船或者其他嘢於佢死前拉起佢，救番佢！」占士大讚班科學家有趣亦自言鍾意同大家做節目，但就形容呢個「救Jack方法」係垃圾！