迪瑪希封海豚音王子　狂飆高音嚇窒網民

內地歌唱節目《歌手2017》未開播已經是非新聞不斷，而當中最令觀眾留下深刻印象必定係嚟自哈薩克23歲嘅迪瑪希。迪瑪希喺最新一集比賽中，擊敗同場嘅實力歌手林憶蓮同杜麗莎，成為現場觀眾票選嘅第一名，佢嘅N次升key嘅唱功更加引起網民追捧，封佢做「海豚音王子」。

出身音樂世家

被受網民追捧嘅迪瑪希喺哈薩克出世，出身音樂世家嘅佢爺爺係一位樂器演奏家，父母係當地著名嘅音樂家，由細佢已經喺濃厚嘅音樂氣氛之下成長。網上就上載咗一條迪瑪希同父母同台表演嘅片段，迪瑪希完全遺傳咗爸爸嘅粗眉大眼靚仔樣，同媽媽嘅好歌喉，網民話佢同媽媽聲線好似，仲讚佢把靚聲青出於藍！睇番迪瑪希唱歌時候個樣，真係同爸爸似到十足十！

觀眾睇到喊

迪瑪希音樂天分極高，佢五歲嘅時候已經以歌手身份參加音樂學院嘅比賽，除咗唱得，佢仲好彈得，六歲迪瑪希就獲得全國鋼琴大賽冠軍。而令迪瑪希一鳴驚人就係2015年勇奪歐亞歌手大賽第一名，仲被稱為「哈薩克國寶級歌手」。由網上片段所見，當時21歲參賽嘅迪瑪希，着住套白色西裝，大曬佢嘅海豚音，令台下觀眾睇到喊出嚟，佢仲唱到踎曬喺地，咁落力抵你攞冠軍！

吸引大批女粉絲

到咗今年迪瑪希參加內地節目，面對住咁多位前輩歌手，迪瑪希一啲都冇怯場，喺第一場比賽輸咗之後，佢仲好大口氣咁話：「自己冠軍從來沒有失手」。雖然首戰輸咗，但佢唱咗被稱為「世界五大最難的法文歌之一」嘅《一個憂傷者的求救》，即時技驚四座，連林憶蓮同杜麗莎都聽到目定口呆！迪瑪希靚仔又有才華，當然吸引大批女粉絲，不過網上就流傳咗張疑似女友嘅合照，令到少女粉絲嘅心碎到一地都係，而迪瑪希亦冇直接回應傳聞，只係話：「有沒有女朋友是一個秘密，感謝大家的喜歡，也希望大家越來越喜歡。」

網民有話兒

Waxxxxx3：全家都能唱，真厲害。

Poxxxxxjj：這一季會是他最紅最火， 太捧了！

Texxxxxhy：男生的最高音！那個海豚轉音飆了3次 一路升key 有點吃驚

Acxxxxxxn：又靚仔又有才華贏晒啦！

Mexxxxxxo：根本無敵呀！