東方日報C1：親子出巡　張栢芝學精財物黐身

昨日大年初七人日，圈中靚媽紛紛出動帶寶貝仔女慶生。張栢芝與兩個寶貝仔入迪士尼玩餐飽， 沿途被遊客追住喪影，受歡迎程度拍得住米奇。至於陳慧琳則與兩名囝囝行街食雪糕，連準媽媽吳若希亦趁好日，幫肚中BB選購嬰兒床。而早前遭家傭盜竊財物的栢芝，昨日

張栢芝早前遭家傭盜竊56萬財物，事件鬧上法庭，家傭被判監18個月。家傭於庭上求情時，曾公開指摘栢芝財物「周圍放」令她受不住誘惑。自發生閉門失竊事件後，栢芝明顯受到教訓，盡量留港親自看實頭家。近年少有留港度歲的她，今年更一反常態，昨日更趁大年初七人人慶生之際，聯同細佬張豪龍、多名友人及數位小朋友，陪伴兩名寶貝兒子Lucas及Quintus 到主題樂園狂歡。

未知是否對被盜財物有陰影，栢芝照顧兩個囝囝的同時仍不怕辛苦，狼狽地一人孭實兩個袋，將貴重物品全部跟身，完全不假手於人。不過，慣了方便的她仍然「大頭蝦」，經常忘記關好大袋，全程任由大袋趟開口任睇。

紮紮跳玩機動遊戲

下午3時多，紮上馬尾、穿上長牛仔褸、戴大黑超的張栢芝現身樂園，陪同兩名紮紮跳的兒子到處玩機動遊戲。栢芝母子由職員開路，所到之處如同樂園星級卡通人物出巡，受歡迎程度不下於米奇、米妮，每到之處均有市民及遊客包圍。栢芝懶理全程被影，活力十足的她，幾乎每項遊戲都陪兒子們玩。登上遊戲機，第一時間亦不忘和囝囝及友人自拍。

爆瘡凸腩隨地踎坐

薄施脂粉的栢芝難掩爆瘡，大動作上落時更不慎露出一小截腩肉，雖然不是最佳狀態，但栢芝依然非常友善，每有人上前邀合照均來者不拒。Lucas及Quintus玩得投入，未幾已身水身汗，只見栢芝細心地幫兩人抹汗，又掏荷包買雪糕請同行的小朋友食。眼見細仔Quintus 開始露疲態，栢芝不拘小節地踎地安撫其情緒，繼而更坐下和他傾偈。哥哥Lucas亦充當小司機，主動幫媽媽手推坐在BB車內的細佬，兩兄弟超多互動，感情似是相當不錯。及至行到攰， 一行人步入餐廳醫肚兼休息， 抖足精神又再玩過， 至天黑仍未捨得離開， 繼而睇埋煙花才盡興走人。

更多新聞，請瀏覽東方日報網頁：

http://orientaldaily.on.cc/