《銀魂》造型執到走樣 堂本剛變咗山下智久

20170204
東網電視
更多新聞短片
堂本剛扮演的高杉晉助(左圖),粉絲覺得造型似山下智久(右上圖)多過似堂本剛(右下圖)。
日本男星小栗旬主演改編漫畫家空知英秋筆下的人氣動漫《銀魂》的真人版電影,將於7月14日在日本開畫,戲中角色造型分批登場,繼主角小栗旬飾演的坂田銀時、菅田將暉飾演的志村新八、橋本環奈飾演的神樂都、岡田將生飾演桂小太郎及長澤正美飾演的志村妙登場後,尊尼組合Kinki Kids成員堂本剛與菜菜緒的造型亦曝光。
堂本剛在戲中飾演鬼兵隊成員高杉晉助,之前不少粉絲都覺得他不太適合扮演,認為阿剛的高度和身形跟原著人物有距離,可能導演福田雄一亦留意到這一點,定妝照特別經過電腦大執,結果造型跟原著相當近似,只見阿剛左眼包上繃帶、手執煙管,係有幾分似原著人物,但又執得過份得滯,執到變咗V煞下巴,個造型睇唔出係堂本剛,係邊個?班粉絲哈哈大笑話:「似「山P」山下智久呀!」咦咦!睇落真係好似「山P」,難怪班網民話笑爆嘴,好想睇套戲拍咗出嚟個陣,堂本剛點樣變身「山P」。
其實唔係個個造型都走晒樣,好似菜菜緒飾演的來島又子,金髮露臍的索爆女槍手,又性感又有型有格,班粉絲就話好Like。除咗兩個造型之外,新井浩文飾演的岡田似藏、佐藤二朗飾演的武市變平太的造型亦曝光。