《韓劇榜》：李英愛相隔14年拍劇戀宋承憲

又到新一集《韓劇榜》啦！等咗14年終於等到「大長今」李英愛返嚟，佢同宋承憲主演嘅新劇《師任堂，光的日記》已經喺上個月首播咗啦，李英愛今次要挑戰一人分飾兩角，仲要係古代同現代呀，而宋承憲就飾演佢古代角色新師任堂嘅初戀情人。今集仲會介紹男神宋仲基、蘇志燮同黃政民嘅新片《軍艦島》，真係淨睇預告片都覺得好緊張啦。

每逢農曆新年，MBC電視台都會舉行《偶像運動會》，今集《韓劇榜》會同大家回顧精彩片段，好似防彈少年團同Seventeen嘅接力賽咁，而I.O.I終於喺上個月底解散，今集會同大家一齊聽吓佢哋嘅告別之歌《陣雨》，大家記住唔好錯過啦！