踩情侶單車險炒　黃美棋恨返無綫拍劇

藝人黃美棋及鍾健威（Ray）自從認愛一直表現甜蜜，二人趁元宵佳節到大圍挑戰雙人單車兼到車公廟拜神祈福！只見貪玩的美棋自薦載男友，身形嬌小的她雖然雙腳全程「掂唔到地」但逞強照踩，結果差點撞壆收場，全靠男友Ray用腳煞車，場面搞笑又sweet爆！美棋事後辯稱差點「炒車」全因男友太肥：「問題唔在於高矮，係因為佢重啲，我輕啲囉！」令Ray哭笑不得！

去到邊都被催婚

談到新年安排，二人表示互相到訪對方家中拜年，Ray更出動家鄉特產蠔豉「收買」美琪父母。問到二人有否被催婚？美琪笑言被「全方位」催婚：「成日去到邊度都畀人催呀！佢哋叫我唔好再?利是。佢屋企人、朋友都催我哋！反而我父母唔捨得我咁快嫁！（有計劃結婚？）冇咁快，短期內都唔會。」而Ray就說：「我細佬結咗婚，個個都話我畀佢爬頭。其實唔好咁急啦，適當時機就會發生！」

搵方式同娘家合作

其後他們到車公廟轉風車求好運，身為樂隊sp'ACE主音的Ray稱想求健康運及事業運，又言新一年會把工作重心放於樂隊上，以免隊友詐型。至於美棋就言渴望有機會拍電視劇，更自封「變態工作狂」：「我希望有機會拍劇，平時咩劇都會睇。同埋我有啲變態好鍾意好忙嘅生活，例如外景接廠景，廠景再接外景。（無綫有冇搵過你？）一路希望睇吓用咩方式合作，話晒細個曾經合作過。」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon