余曉彤孖「雲迪素」「甄子丹」街市買魚

運動型模媽余曉彤（Hidy）早前到澳洲拍攝ViuTV旅遊節目，節目想表達一個女士即使已婚及生BB，一樣可以自己享受旅遊，活得精彩，而節目內Hidy要自駕遊，但甚少駕駛的她可謂相當驚險：「我考咗車牌兩年，但喺香港未揸過，開頭我以為OK，但澳洲旅遊局人員話我控制得唔係太好，佢哋一路拍一路驚，所以導演盡量安排大直路，拍出嚟幾有型，其實係斷斷續續分開好多個Shot剪埋！哈哈！」

沖浪玩到流鼻血

今次行程相當豐富，每日都有難忘事，令Hidy大叫非常充實：「第一日落機我就漏咗護照喺飛機，好彩最後靠旅遊局人員搵得返，之後轉飛機，我有個行李突然爆開咗，要用封箱膠紙黐返，好狼狽！玩沖浪時又畀塊板撞到塊面，個鼻流晒血！好多嘢都好難忘，去魚市場嗰陣，我發現檔主好似雲迪素，我哋導演就似甄子丹，於是我就同兩位『大明星』拎住條大魚合照！我仲去咗水族館潛水、上食物車賣冬甩，同埋玩街頭塗鴉，我寫上中文『風雨』兩字，代表我哋香港人面對風雨都唔怕！」

入鬼屋要簽生死狀

而最令Hidy驚嚇的就是突然被安排入鬼屋，到訪有幾百年歷史的荒廢瘋人院，進入前更要簽下生死狀，Hidy後悔都嗌唔切：「真係覺得玩命咁！嗰度好陰森好驚，度門會自己開，張櫈會突然跌，我驚到喊，成晚都覺得好心寒！」