咩玩法？！洪卓立晒湯怡浸溫泉片

歌手洪卓立同女朋友湯怡拍拖十年，時不時都晒恩愛，今日趁住情人節，佢哋兩個就揀咗呢一日喺Youtube開咗個Channel叫「大洪小怡」，記錄拍拖嘅點滴。頭炮就係佢哋早前去北海道玩嘅Vlog！成日都畀人催結婚嘅佢哋，估唔到上飛到機都畀人問，湯怡話：「佢問我哋係咪一家人？我就答番佢我哋一齊架！」講嗰陣湯怡仲鬼死笑得咁甜，就知道佢真係好想嫁畀洪卓立啦！

網民嗌眼盲

佢哋仲大耍花槍，兩個人到咗北海道已經係夜晚，加上冬天時份就凍上加凍，不過湯怡一於冇理，都係着裙仔現身，啲風入晒條裙到真係好寒呀，但呢個時候洪卓立就話湯其實無論幾多度，佢都係唔着褲，少少慰問都冇！不過男人都係口是心非嘅動物，要錫你其實都唔使靠把口嘅，鏡頭一轉已經見到洪卓立Man到爆咁一個人拖緊兩個行李搵酒店，原來係洪卓立叫湯怡拍片，自己辛苦少少冇所謂，真係好恩愛呀，令唔到網友大叫閃到眼盲！

幾經辛苦終於都嚟到酒店喇，因為都已經係好夜嘅關係，所以洪卓立兩口子就選擇留番喺酒店食晚飯！之後佢哋又玩猜包剪揼，輸咗個一方就要用日文同侍應講多謝，結果就係洪卓立輸咗，不過佢都好有體育精神對侍應講咗，唔少網友都話佢兩個好似大細路，私底下嘅相處方面仲好搞笑添！最後，仲加映就佢哋去浸溫泉，雖然好大煙唔係好見到樣，但都好清楚見到湯怡浸緊溫泉，唔少網友都問洪卓立喺邊，咁佢梗係做攝影師啦，仲懶神秘咁話：「喂，大家係咪睇唔到樣呢？啱啦，下集見啦！」

__________________________

想聽歌？想睇MTV？想了解本地Indie Band資訊

快啲click入「聲大夾樂」專頁： http://on.cc/musicon