外國返嚟有着數!宋熙年想搞語言學校
藝人宋熙年到電台受訪,表示獲李居明師傅教路:「師傅有講幾時生小朋友好,同埋因為嚟緊我哋諗住創業,都有問佢做咩生意好,佢話我哋今年有呢個運,畀咗支強心針,我哋都想儲多啲奶粉錢先有小朋友。(想做咩生意?)我同Jason(陳智燊)有諗過做啲服裝生意,或者語言中心或補習學校,因為我哋都喺外國返嚟,所以呢方面都有興趣,都想做啲培育下一代嘅嘢,師傅話呢啲都啱我哋。」問到師傅話幾時生B?她謂:「佢話今年下半年至年頭都ok。」

她亦謂現時了解緊做甚麼行業好,問到幾時會有生意?她謂如果籌備都至少需時半年至九個月。問怕不怕兩公婆做生意會講錢傷感情?她謂:「我哋不嬲唔會為金錢傷感情,只係我哋兩個都好有主見,驚搵唔到磨合,不過我諗都ok,我哋相處多年,會互相遷就。」她亦謂多謝江美儀請她上此節目受訪,又笑言:「好多人以為我鬼妹仔唔問呢啲。(以前都試過問呢啲?)唔敢,佢哋話如果風平浪靜嘅話唔好問,因為會影響自己諗法。」