名人：何國鉦食腦轉型　設計制服創錢途

明星御用時裝設計師何國鉦（Dorian），向來是食腦之人，五年前瞄準制服市場有利可圖，遂踩入制服界，接公司訂單做制服，動輒一張訂單700萬，甚有「錢途」，故即使經濟持續放緩，同行的生意均受影响，唯他收入不減反升。他說：「以前啲企業做制服好公式化，A衫＋B褲＋C外套，ABC加埋套餐，然後釘個公司logo就算，係近呢5年先至流行搵設計師做制服，原因企業競業激烈，要喺同行之間突出自己地位，畀人第一個印像好緊要，制服就變得重要。初初同廠合作做制服，覺得我地設計前衛啲，唔同佢地傳統做法嗰套，試過就slim cut問題同啲師傅拗到七彩。」

一張單700萬

做制服跟度身訂造大不相同，但Dorian認為制服更具挑戰性，因為多人着，更有自豪感，說：「同一款設計，要個個着得好睇唔容易，而且技術上，制服係日日着，日日洗，有可能一套衫要着十年，實用性加慣用性，唔容易做到。初時試過接咗做設計，但個客搵其他人生產，點知就出咗問題，同我設計有出入。」於是他向客人建議設計和生產一手包辦，之後再建議做企業培訓，以確保自己設計保持風格，沒有走樣，慢慢竟然開拓了做制服的門路，先後為銀行、珠寶店和航空公司合作。說：「試過有啲公司職位多，員工多，夏天和冬天，每人每季兩套，一張單試過700萬，都唔錯。」

一條龍服務包冇錯

由於習慣了做度身訂造的模式，習慣與客人溝通，多了解對方需要，Dorian認為做制服也一樣，要了解着衫的人點着衫：「我會靜雞雞去搵啲員工傾下偈，好似原來佢地會覺得如果件褸多個袋會好啲，條褲太窄好易爆，呢方面嘅資料個客唔會畀到我。而企業培訓都好緊要，好似連身裙制服，究竟襯乜顏色襪呢？有啲人唔知道絲襪好重要，容易着錯色，我發覺有本guide book畀啲員工照住做，原來好有需要。既然都設計，做埋培訓，一條龍好啲，由頭到尾佢唔使煩。」Dorian續說：「如果冇自己嘅品牌，我就唔會有機會做到其他嘢，呢幾年市道係差咗，對高訂時裝影响大啲，但制服生意反而有增長，可以互補，所以我唔會放棄自己品牌。」

想挑戰設計校服

早前Dorian更為母校培正中學周年紀念設計服飾，首次為學生設計制服，大感好玩，希望有日能夠為其他學校設計校服，笑言：「有啲學校校服就係好肉酸，肉酸到唔想返學㗎！哈哈，我諗做校服會好玩，校服對像係年輕人，自己都經歷過做學生，細個時都好反叛，唔鍾意着校服，後來我轉咗去國際學校，成績突飛猛進，冇束縛啩！」