【母女大戰】阿田簡淑兒互摑 網民心痛
無綫劇集《迷》劇情進入白熱化,昨晚播出簡淑兒(Jessica)同田蕊妮(阿田)呢兩母女喺一間荒廢嘅小屋上演「六國大封相」,兩人你一言我一語,連珠爆發,講到激動時更互摑對方。觀眾睇到都大嗌過癮,仲話冇諗過新人Jessica對住視后田蕊妮都可以發揮得咁好,冇畀對方嘅氣場壓過,更話對Jessica另眼相看,大讚佢演技自然!

Jessica憑無綫處境劇《愛.回家之八時入席》而人氣急升,好多網友都話佢有一對迷人腰果眼兼甜美笑容,仲話會令到人三秒鐘墮入愛河!不過今次Jessica喺劇集《迷》中飾演任性學生妹,仲成日同飾演佢阿媽嘅田蕊妮嗌交,每次都七情上面,睇到觀眾勁肉緊,大鬧佢衰女,仲有網民留言鬧生嚿叉燒都好過生佢。

喺昨晚播出嘅一集,Jessica同田蕊妮就演出「世紀大戰」,劇情講到Jessica同綁匪金剛傾掂數,改為勒索媽咪田蕊妮400萬港元,點知正當金剛出去攞贖金嘅時候,田蕊妮就靠住電話嘅定點功能,搵到囡囡Jessica,就係咁大戰一觸即發。

田蕊妮質問Jessica點解要扮被綁架嚟勒索媽咪,而Jessica亦不甘示弱,大數田蕊妮嘅不是,話:「媽咪估唔到你嘅演技咁好!」之後田蕊妮大打溫情牌,話:「媽咪做所有嘢都係為咗你!」之不過Jessica唔領情不特止,仲鬧阿媽攞晒啲錢去瘟仔,激到田蕊妮一巴摑落Jessica度,大鬧佢自私。被打嘅Jessica冇停口繼續鬧,仲話:「我唔顧自己就咩都冇㗎啦!」嬲到田蕊妮又想舉手摑佢,不過今次就畀Jessica反擊成功,仲反摑咗田蕊妮一巴。睇到呢度,網民大叫心痛,話好似畀自己個女摑一樣,連田蕊妮都喺自己Facebook貼咗呢段戲,留言:「嗰一巴嘅痛都唔夠個心痛!」認真夠晒入戲!

網民有話兒

Mī XXXXi:我鐘意左(咗)簡淑兒.新人來講演技以好好.好自然.有內心戲.比八時入席又誇進一大步.八時入席仲未有演技.今次演活了衰女角色..好野(嘢)

MiXXXXXn:依一巴睇到我心都痛 Cal姐啊😭不過演技真心爆燈

HuXXXXXng:那麼快就結局了,還看不夠呢!但是重看又沒有那種感覺

FoXXXXXin:由內到外再到番內都是好戲好演技

AmXXXXXg:亞(阿)囡摑媽咪,有D(啲)心痛!好似自己比亞(阿)囡摑一樣!

__________________________

想聽歌?想睇MTV?想了解本地Indie Band資訊
快啲click入「聲大夾樂」專頁: http://on.cc/musicon