【演技大爆發】阿田痛失愛女崩潰再流涕

20170302
東網電視
更多新聞短片
阿田啲演技真係超晒水準,睇到全城爆喊呀!

視后真係視后,啲演技真係冇得輸,話喊就喊,仲喊到鼻涕都流埋!講緊嘅咪就係田蕊妮(阿田)囉!尋晚除咗佢,個個都睇到真係喊出嚟,因為佢個「女」死咗呀!今期流行無綫熱播劇《迷》,高潮一浪接一浪,前晚阿田先同佢個女簡淑兒玩互摑,唔只阿田鬧得好,網民都大讚簡淑兒夠「衰女」(相關新聞: https://goo.gl/XAPnVP ),不過正所謂「好戲在後頭」,估唔到上演完一場母女大戰後竟然係離別之時……

尋晚喺劇中鄭嘉穎就同阿田講佢個女死咗,阿田開頭完全唔相信但又呃唔到自己,直至見到啲證據先冇得唔信,仲喊到差啲暈低(有理由相信佢真係想暈),個情感演繹完成恰到好處,但身為視后點只得呢啲,去到認屍時,阿田要爆啦!

阿田終於見到個女,不過對方已經係一副沒有靈魂嘅軀殼,痛失摯親嘅阿田好自責,唔只崩潰淚如雨下,仲喊到鼻涕都流晒出嚟,啲內心戲夠自然又有起承轉合,真係睇到一班網民勁心酸,紛紛喺阿田個Instagram留言讚佢演技更上一層樓、收放自如、有層次,好評數都數唔晒!而阿田就話老公杜汶澤都讚佢,仲要飲杯慶祝!

而簡淑兒都令網民刮目相看,佢就喺Instagram留言:「對唔住啊媽咪,令你心碎…我知錯啦,我走咗之後你要照顧好自己…」佢仲搞笑有遺言:「記得攞返(番)爹哋嗰40萬!」仲話想多謝阿田,激讚對方連眼睫毛都識做戲咁話呀!
__________________________

想聽歌?想睇MTV?想了解本地Indie Band資訊
快啲click入「聲大夾樂」專頁: http://on.cc/musicon