羅頌欣忙爆拍劇做舞台劇不忘做善事

女藝人羅頌欣（Debbie）與「蛛蜘女」鄭麗莎等早前參與慈善步行，幫山區小朋友籌款，雖然天氣寒冷又要早起身，但仍無阻一眾參賽者的熱情，已是第三年擔任大使的Debbie說：「比前兩年多咗人參加，好多人仲帶埋小朋友同狗狗參加，好熱鬧！今次行咗半條麥理浩徑，大約用咗兩個幾小時，行上山啲風景好靚，所以唔覺辛苦！（平時做開運動？）有行山，最犀利行六個鐘，平時又有打泰拳，有做開運動，都應付到，不過最近唔係好夠瞓，忙參與電視劇又要籌備舞台劇，有啲唔夠瞓，不過行完山個人仲精神。」