娛樂專題:李旻芳返西貢成長地回憶初戀

20170314
東網電視
更多新聞短片
當年趕返學都要跑「亡命大斜路」。

藝人李旻芳(Lucy)去年擔任無綫節目《東張西望》外景主持,憑34C上圍躋身「宅男女神」行列,今次她重遊成長地西貢,讓大家更了解女神的過去。Lucy自爆以前返學要行一條「亡命大斜路」,每次差不多要遲到更要喪跑,由最初跑到氣咳變成運動健將,更試過奪「全校最佳女運動員」獎項,認真威水!

未入行已出鏡

正所謂民以食為先,自幼於西貢居住的Lucy當然食勻該區,這位為食地膽第一站帶大家「食好西」,重溫昔日的好味道。她說:「西貢有條食街,咩都有得食,每逢中學放lunch我就會嚟呢度搵食,仲成日幫襯喺街尾嘅泰國菜舖頭,特別鍾意呢度嘅雞絲米線,好味到食足咁多年都唔厭。」除了味道外,該食店亦有不少Lucy的特別回憶,她透露未入行前已經出鏡:「因為呢間舖好出名,吸引唔少媒體採訪,我又成日幫襯,所以有時會喺報道見到我個背影,都算係人生第一次出鏡。有一次差少少可以正面出鏡,但當時我掛住影低同學畀人採訪嘅一刻,所以最後都冇份,依家入咗行算係彌補番。」

玩暗戀冇下文

另一個充滿回憶的地方,就是Lucy曾就讀的小學及中學,原來她每日返學必經「亡命大斜路」,每次差不多遲到,例必奔跑,練成其運動底子。她說:「正正因為行得多呢條亡命大斜路,練就我一身肌肉,所以我運動細胞都幾發達。(當時玩開咩運動?)其實我咩都玩,小學主力練短跑同長跑,中學就貪心啲,同時係排球、足球、籃球同手球嘅校隊成員,所以一放學就要練波。最威水係攞過全校最佳女運動員嘅獎項。」

求學階段少不了那些年刻骨銘心的暗戀回憶,Lucy笑說:「中學時暗戀過隔籬班嘅男同學,就連我啲死黨都唔知。當時我太怕醜唔敢表白,惟有喺鎖匙上面偷偷地刻咗佢個名,希望有朝一日佢會睇到發現我嘅心意,但佢最後都冇發現到,所以最後就咁結束咗。」

人情味冇變過

近年西貢發展迅速,面對成長地急劇變化,Lucy亦坦言感到陌生:「記得細細個媽咪成日帶我哋落樓下遊樂場玩,嗰時我哋五兄弟姊妹爭住玩旋轉單車,媽咪仲會抱住我哋玩滑梯。舊式滑梯用鐵製,瀡得特別快又刺激,天熱時仲會辣pat pat。不過呢啲設施已經買少見少,遊樂場亦拆卸變咗做餐廳,冇晒童年回憶好可惜!」雖然昔日回憶不在,但人情味依舊未變。受訪當日,Lucy巧遇多名舊街坊及同學,即使相隔多年再見面,依然有說不完的話題。她說:「西貢從來冇變就係嗰份親切感,啲街坊唔係同我一齊長大,就係睇住我大個,大家成日都見,好似一家人咁。即使我搬咗出去住,佢哋依然好關心我,頭先一見面仲雞啄唔斷,呢度同以前一樣咁有人情味。」

後記:婚後搬返西貢

因工作關係,Lucy三年前搬往將軍澳居住:「其實我由細到大都住喺西貢,不過入行後工作時間日夜顛倒,所以先搬去將軍澳住方便返工。當初要搬走真係好唔捨得,我所有朋友同屋企人都住喺西貢,呢度又充滿回憶同人情味。我一直覺得西貢先係我真正嘅屋企,所以好希望結咗婚可以搬返嚟住,等小朋友都可以喺有愛嘅環境下成長。」