老姑婆莊思敏踢爆樂瞳地下情

東網電視

莊思敏個樣...

TVB又有新嘅話題作《我瞞結婚了》！除咗男主角洪永城同女主角黃翠如大受關注之外，連莊思敏都成功引起唔少網民嘅注意。今次莊思敏係劇裏面雖然收起咗事業線，但佢戴埋個假髮，扮演老姑婆。憑住呢個Look，佢已經係網民心目中上咗位啦！

入型入格

今日「See See TVB Facebook專頁」就上載一條咗由莊思敏嘅片，教網民三招去踢爆公司嘅地下戀情。先唔理會呢啲招數得唔得，喺片嘅開頭，就已經可以見到莊思敏嘅搞笑演技，拎住兜花生話睇住人哋點收科，淨係睇到莊思敏呢個入型入格嘅表情，就夠晒數啦！除咗莊思敏之外，藝人樂瞳同埋演員何君誠都係功不可沒！

第一招：刻意保持距離

踢爆戀情第一招，刻意保持距離。喺片中，樂瞳同何君誠就扮演地下情侶，何君誠行過樂瞳嘅時候，特登整咗一下樂瞳啲頭髮。比人撩嘅樂瞳，就咬住唇回頭一望睇吓發生咩事啦！喺呢個時候，莊思敏就眼火爆，淨喺個表情當然唔夠表達佢嬲嘅程度，加埋個整到莊思敏眼火爆嘅特效，真係夠晒抵死！

第二招：默默傳訊息

踢爆戀情第二招，默默傳訊息。傳訊息唔好以為冇人知呀！睇吓就知咁樣做有幾咁明顯！個個都食緊飯，但喺樂曈同何君誠夾住咗莊思敏喺中間，不停咁短訊，仲要加埋眉目傳情，所以莊思敏講得一啲都冇錯，連Canteen阿姐都知佢兩個有路啦！

第三招：成日扮OT

踢爆戀情最後一招，成日扮OT。明明冇嘢做，又唔肯走，睇吓何君誠！莊思明一叫佢走，即刻就話有嘢做。明明就係等人收工，莊思敏睇唔過眼，都即時畀咗個白眼佢。

網民有話兒：

GXXX NX : 平時都唔覺莊思敏咁搞笑！

CXXXX AX : 睇嚟可以期待下佢套劇！

MXX CXXX : 莊思敏幾時可以除咗個假髮呀？

ＫXX CXXX: 嘥咗佢個靚樣。

on.cc東網