定欣呢？陳展鵬認與單文柔山頂車內食飯

「視帝」陳展鵬日前被拍得與落選港姐單文柔摸黑駕車到山頂，二人因而傳出緋聞。展鵬接受東網訪問時否認與單文柔拍拖，又言因對方幫自己做styling而成為朋友：「我同佢識咗一段時間，我有份做港姐評審。佢幫我做styling，因為佢喺英國讀Fashion，有時會幫我執吓衫，（被影）當日我想請番佢食飯，但做完嘢晏咗少少，中環冇位食，就諗不如買嘢上車食。我明白山頂係個好敏感嘅地方，但係好多人都上山頂影相。當時我諗如果食嘢就揀個靜啲嘅地方，想法好簡單，大家唔好諗衰嘢。」

忙到冇時間拍拖

他直言冇時間拍拖：「我自己不停做嘢，難得有幾日私人空間先可以約朋友食飯，我邊有時間開始一段感情？正常交往都影響身邊嘅人，覺得唔好意思。」

否認與胡定欣拍拖

提到有傳他趁緋聞女友胡定欣離港出trip就約其他女仔，展鵬就稱與定欣是好朋友及螢幕情侶：「我之前喺車淑梅個訪問都講過，我當然希望係銀幕同定欣拍多啲好戲，但我都有私人生活同時間。我明白自己食得鹹魚抵得渴，大家都擔心我幾時拍拖同結婚。但正常交往都變成咁，大家係咪想我做和尚？畀啲空間我。（怕唔怕定欣唔開心？佢有冇為此事搵你？）唔會啦，大家係好朋友，螢幕情侶，我冇時間，比我放吓假啦。」展鵬又表示獲公司信任：「樂小姐（無綫高層樂易玲）打畀我話相信我，叫我自己回覆傳媒。」

被追訪到警署備案

他談到當日被傳媒追訪後就到了灣仔警署備案：「當時有兩個人衝出嚟，我以為佢要老笠我，事後我備咗案。我當時好驚，但冇不顧而去。我備咗案先，之後有人追究都OK。我唔係一撞到對方就走。」