暗爽定堅臭?邊個索馮盈盈原味絲襪

20170321
東網電視
更多新聞短片
真係要估吓邊個索過馮盈盈原味絲襪!

藝人森美同小儀呢對金牌組合,主持嘅《千奇百趣》系列節目都口碑唔錯,最近節目添食到第十輯《千奇百趣特工隊》,仲搵嚟32C「咪神」朱智賢同港姐冠軍馮盈盈坐鎮,吸引一班宅男晚晚坐定定睇節目。而節目嘅另一焦點,就係每集嘅尾聲都會懲罰嘉賓,當然唔係罰企咁簡單啦,而係要嘉賓頭笠絲襪,無論係男神定女神亦無一倖免,喺絲襪下慘變豬頭,相當爆笑!

化咗灰都認真

無綫官方FB「myTV SUPER」最近亦剪輯相關短片,睇吓大家認唔認得出呢班「絲襪人」嘅真身。首先低難度篇,換言之好易認得出真身,好似笠咗絲襪嘅李家鼎同謝東閔個樣都冇咩變,學星爺話齋「好似漆黑中嘅螢火蟲一樣咁鮮明、咁出眾」,自然一眼認得出,唔少網友仲笑言佢哋化咗灰都認到咁誇張!

女神慘變豬頭

不過齋睇呢啲笠絲襪相,真係認唔出一班女神邊個打邊個!張秀文同朱千雪等索女唔顧靚樣,接受笠絲襪嘅懲罰,即刻「毀容」變懵眼豬鼻,真係勁大犧牲!就連網友都表示心痛,亦有人發現亮點,就係一班女神笠絲襪後,五官可以猛咁郁,咪證明佢哋冇整容囉!其他人都唔係咁易估,好似吳業坤(坤坤)笠絲襪面容扭曲,離遠望完全唔知係邊位,戴番副眼鏡先認到咋,難怪網友都話今次係認眼鏡唔係認人,認真搞笑!

話時話,集集都要玩頭笠絲襪,究竟啲絲襪係點嚟?片中開估啲絲襪係馮盈盈,仲要係未洗嘅絲襪添,即係原味絲襪咁爆!點知一班網友錯晒重點,有人竟然話啲絲襪一定好香,仲話都想試吓笠絲襪,同女神零距離接觸喎!

網民有話兒:

XXANNXX:其實森美先最慘,佢係笠完最醜樣個個XDD
HowingXXX:鼎爺個樣都冇變,真係化灰都認到!
XXXnifertse:陰公豬,千雪都要被懲罰......
KINXXXNG:好想笠下馮盈盈對絲襪!