郭偉亮唔覺葉佩雯有怪病：係荷爾蒙失調

音樂人郭偉亮（Eric）出席愛護動物協會活動，他稱家中養有兩頭愛犬，前年首次經歷愛犬離世：「真係人生中最難受嘅經歷之一，所以好明白點解有啲人喺寵物死咗之後唔想再養。提到早前本報拍到Eric太太葉佩雯身形腫脹，她承認怪病復發所致，Eric坦言：「其實我唔覺得係怪病，係荷爾蒙失調，不過，自從報道出咗後，黎瑞恩好熱心，主動打畀我哋，介紹Grace去睇自然療法，其實我哋本身同黎瑞恩唔係好識，但因為報導而多咗位朋友，今日Grace去咗試自然療法，希望有幫助。」

問到Grace會否因病而有困擾，他承認女生也愛美，雖然Grace所吃不多，但仍然會腫漲，問他會如何氹太太，他笑言：「唔會氹，講笑，我日日都氹佢啦。（個病有冇影響日常生活？）冇，佢幾精神，間中都有人搵佢客串拍戲，都OK唔辛苦，但如果戲份多嘅話就要諗吓，因為佢照顧我同兩隻狗都幾辛苦。（所以就決定養狗唔養人？）人仔我哋兩個都唔係好想養，賺人仔當然冇問題。其實狗仔到咗晚年都要用好多時間去照顧，有時我哋兩個去旅行都會好擔心隻狗。」