親身經歷！雷晴雯認同強逼無助藝術發展

藝人雷晴雯（Winnie）出席了國際知名作曲暨指揮家譚盾的21世紀青年音樂計劃「譚盾100面對面」講座及大師班，並欣賞了譚盾加上國際知名小提琴大師姚珏，率領由她創立的香港弦樂團，且聯同香港八大院校精英所組成的「21世紀聯校樂團」，共同攜手所演奏「超時代音樂會 • 譚盾」的精彩演出。

Winnie表示演奏會當晚是畢生首次奉旨開住手機睇演出，更可於演奏會期間齊齊以手機玩互動，直呼構思妙絕：「平時未開場已經被叫熄手機，今次入場前工作人員反而不停請觀眾記得先下載手機程式同入場後一定要開住電話，演出時，由譚盾老師指揮住觀眾輪流播放手機程式中嘅音樂，再配合台上樂手嘅弦樂演奏，令人耳目一新。」

對於出席譚盾的講座及大師班，Winnie坦言譚盾的一席話令她感受甚深：「譚盾老師喺演說中不斷強調父母強逼性壓力絕對無助小朋友嘅藝術發展。喜歡藝術嘅人本身心裏面都有一根弦，叫做『心弦』，而音樂所包含嘅道理其實亦全部存在喺生活之中，與生活息息相關唔可以分割，所以先要將藝術同音樂視為一種喜悅、活動、興趣及愛好，將它變成生活，令小朋友願意主動進入探索裏面嘅世界，並將古今中外嘅藝術音樂文化連繫埋一齊，使之變成一種有趣好玩嘅遊戲，咁先可以令更多人愛上音樂同藝術。」

譚盾的一番肺腑之言卻勾起了Winnie童年的虎媽回憶：「細嗰有段時間好鍾意彈鋼琴，後來有得學本來好開心，點知最後因為每日做完功課就即刻被媽咪逼練琴，而且練親都起碼一個鐘，加上媽咪自己識彈琴，我彈得唔好佢真係會拎鐵尺入琴房打我手心，到最後真係見到鋼琴同琴譜就驚。」