樣似陸浩明!馬家豪靠「賤格星腔」上位
藝人周星馳退居幕後,星迷大嘆可惜,冇樣睇聽聲如可一解「星癮」的話,大家可在無綫真人騷和節目《有樓萬事足》和《千奇百趣特工隊》中回味一下,加盟無綫兩年多的35歲配音員馬家豪,主力為綜藝節目做旁白及配音,因聲線和腔口都有九成九似周星馳而被起花名為「馬爺」,可見大家追捧星爺周星馳之情仍很熱切。

馬家豪接受東網訪問,他同樣以「星腔」笑說:「我何得何能!因為《千》監製張志明覺得我把聲講嘢時賤賤格格,又有啲似周星馳,其實大家都係睇佢啲戲大,佢既神韻都入晒腦,而我同一班幕後大哥拍嘢混熟咗,所以先起呢個花名!」由娛記出身再入職無綫做幕後的家豪,得到監製林志榮和部門高層張志明賞識,認為他的聲好而將其力薦為綜藝節目配音。而家豪亦對資深配音員林保全亦很敬重,作為後輩的家豪,他大讚保全叔為神級配音員,對做保全叔接班人,他不敢當謂:「完全不敢當!大家都聽他聲入腦,保全叔係神級聲,佢配《多啦A聲》嘅聲係冇人能代,好可惜保全叔過咗身,其實保全叔在前,冇人在後了!(偶像?)我對花師奶好有印,呢位前輩雷碧娜係卡通《我們這一家》配音己有三十多年,佢把聲係老、嫩通殺!」

「星腔」的馬家豪,為入行亦曾接受正統配音訓練,他表示:「讀初班時上咗3堂,阿Sir已叫我出去接Job,幫電影片段配音,除配人聲,我連打鬥反應聲都自己配埋出嚟,其實呢啲係初班未學到,但我就自動波做晒,阿Sir覺得我唔使嘥時間啦,上咗3堂交咗300蚊就學成出嚟!」雖然自幼都愛模仿四大天王的歌聲,每當人家聽到「星腔」都會發笑,但家豪的目標,其實想訓練出一把令人感動到「想喊」的聲線,有着主持陸浩明影子的他,甚至想當幕前:「想練下感動人嘅聲,聲域可以去到不同年紀,呢個技巧要浸,自己都35歲,喺呢行唔係好耐,其實之前我係做記者入行,對影藝圈都好有興趣,除聲演到多類型角色,主持都想試,如果監製有興趣,我都好盼望幕前演出。」